AIX міндеті – бөлшек инвесторлардың аудиториясын кеңейту, бағалы қағаздарға инвестициялауды қолжетімдірек ету, депозиттер мен жылжымайтын мүлікке жақсы балама ретінде биржадағы инвестициялар туралы түсінікті қалыптастыру. AIX орташа статистикалық қазақстандықтар үшін қолжетімді болатын қаржылық өнімдердің кең ауқымын жасау үшін жұмыс істеуде.
2022 жылы AIX «Самұрық-Қазына» қорының Жекешелендіру бағдарламасы шеңберінде Қазақстанның барлық азаматтарына ұлттық компаниялардың акцияларының алдағы жария ұсыныстарына («IPO») қатысуға тең қолжетімділікті қамтамасыз ету үшін тікелей жазылым құралын таныстырды.
Тікелей жазылым – акцияларды бастапқы орналастыру кезінде делдалсыз (брокерсіз немесе андеррайтерсіз) тікелей эмитенттен сатып алу туралы шарт жасасу. Тікелей жазылым бөлшек және институционалдық инвесторлардан брокерлер немесе андеррайтерлер арқылы өтінімдерді жинаудың (букбилдинг) әдеттегі әдісімен қатар жүргізілуі мүмкін. Тікелей жазылым құралы Tabys мобильді қосымшасы және/немесе Қазақстанның барлық өңірлеріндегі «Қазпошта» бөлімшелері арқылы барлық қазақстандықтарға қолжетімді болады.
Tabys арқылы акцияларға тікелей жазылымды ресімдеу үшін инвестордың жеке куәлігі, банк картасы және интернетке қолжетімді смартфон болуы қажет. Қызмет тәулік бойы онлайн режімде қолжетімді болады.
Тағы бір нұсқа – акцияларға тікелей жазылымды ресімдеу және қажет болған жағдайда жазылымға қатысуды ресімдеу бойынша кеңес алу үшін «Қазпоштаның» автоматтандырылған бөлімшелерінің біріне барып, операторға жолығу.
Tabys мобильді қосымшасы қор нарығымен әлі таныс емес бөлшек инвесторларды тарту және олардың қаржылық болашағына инвестициялауға көмектесу үшін 2021 жылы жасалған.