Біздің командамыз

Әйелдерге мансаптық жол құру жеңіл ме?
Қор биржасында жұмыс істеу несімен қызықты?

#AIXteam бейне айдарының кейіпкері - Айжан Орақбаева.
Айжан - Реттеу және Комплаенс департаментінің аға сарапшысы.

Айжанның AIX-те жұмыс істегеніне 2 жыл. Одан бұрын банк саласында 4 жыл қызметте және 9 жыл декреттік демалыста болған.

AIX-те Айжан сұхбаттың төрт кезеңінен өтіп, бизнес ісін шешті.
Оның компаниядан алған тәжірибесін есту қызықты.

AIX-тің әрбір қызметкерінің өзіндік бірегей кәсіби оқиғасы бар және біз сіздермен олардың қызықты тәжірибесімен бөлісетін боламыз. Енді бұл айдар бейне форматта да жасалатын болады және оның бірінші кейіпкері — AІХ-тің UI/UX дизайнері Әлімхан Жапар.

Неліктен ол өзінің қызмет жолын AIX-пен байланыстыруды шешті және биржаны басқа ұйымдардың арасында не ерекшешелейді? AIX туралы Әлімханнан — осы бейнероликте.

#AIXTeam

Жоқтан бастаудан қорықпаймын

Алматы банк колледжін «Банк ісі» мамандығы бойынша, «Тұран» университетін «Қаржы және несие» мамандығы бойынша бітірдім, сосын Ломоносов атындағы Мәскеу мемлекеттік университетінде «Іскерлік әкімшіліктендіру магистрі» біліктілігін алдым.

1994 жылдан бастап Қазақстан Республикасының Мемлекеттік құндылықтар қоймасында, сосын Қазақстан Республикасының Ұлттық Банкінде жұмыс істедім. 1997 жылдан бастап 2015 жылдың ортасына дейін «Бағалы қағаздар орталық депозитарийі» АҚ-та қатардағы маманнан бастап Басқарма мүшесіне дейінгі жолды өтіп қызмет атқардым. Осы күнге дейін өзімнің барлық әріптестеріме құрметім зор және Орталық депозитарийдің тамаша ұжымын жылылықпен есіме аламын.

2016-2018 жылдары өзімді кіші бизнес басшысы және меншік иесі ретінде сынап көрдім. Бұл бизнестің ерекшелігі қаржы нарғынан алыс болды, алайда меншікті компанияны басқару тәжірибесі менің одан арғы мансабым үшін теңдессіз және пайдалы болды.

2018 жылдың ортасында Оталық депозитарийдің және Тіркеушінің басшысы ретінде АІХ командасының бір бөлігі болу ұсынысын алдым. Бұл ұсыныстың өршіл, сондықтан да мен үшін қызығарлықтай болғаны соншалық, аз уақыт ойланғаннан кейін мен келістім.

Алда өте көп нәрсені жоқтан бастау тұрды, жұмыс көлемі өте көп болды және АІХ-те жұмыс істеген алғашқы айларды мен өмірімде ұмытпайтын шығармын. Алайда АІХ-те ешқандай қиындықтар мен кедергілерден қорықпайтын өршіл оптимистерден, кәсіби шебер мамандардан тамаша ұжым жиналды, олар мен үшін тек қолдау ғана емес, сонымен қатар үлгі де болды. Сондықтан біздің қолымыздан бәрі келді.

Маған қор нарығында жұмыс істеу ұнайды. Мұнда толып жатқан қатысушылар тоғысады – биржа, кастодиандар, брокерлер, басқа депозитарийлер, есеп айырысу банктері, эмитенттер, инвесторлар … . Әрқайсысының өз ерекшелігі бар, әрқайсысымен жұмыс істеудің өз тәсілі бар. Және әрқайсысы сені маңызды бір нәрсеге үйретеді.

Жоқтан бастаудан қорықпаймын. Егер қандай да бір істе «шарықтау шегіне» жетіп, енді басқа жаңа және маңызды ешнәрсе үйрене алмайтынымды көрсем – жаңа тәжірибе іздеймін.

АІХ-ке келгенде мен үшін үйреншікті шекара кеңейе түсті. Менімен бір командада әртүрлі елдерден келген әріптестерім, басқа компаниялардан келген қазақстандық әріптестерім жұмыс істейді. АІХ-ке шетелдік клиенттер көптеп қосылуда. Әркім өз тәжірибесімен бөліседі, өзінің ерекше пайымын көрсетеді және сол арқылы менің де тәжірибемді молайтады. Бұған қоса, қазақстандық юрисдикциядан өзгеше, ағылшын құқығына негізделген юрисдикцияда жұмыс атқарамыз, ағылшын тілінде жұмыс істеймыз.

АІХ-те табысқа қол жеткізу үшін көп жұмыс істеуге, өзіңнің алдыңғы тәжірибеңмен шектеліп қалмауға дайын болу және эксперименттерге ашық болу керек. Ал ең бастысы – үлкен команданың бір бөлігіне айналу керек. Қолымыздан бәрі де келу үшін, біз біртұтас болуымыз қажет.

Басқалардың бәрі сияқты емес

Манчестерде университет бітіргеннен кейін мен алған бар білімімді қолданып, өз еліме пайдамды тигізу үшін Қазақстанға ораламын деп шешім қабылдадым. Қазақстандық банкте бөлшек сауда бөлімінде жұмыс істей бастадым. Дәл сол кезде АХҚО жобасы туындай бастаған болатын, қаржы саласында жұмыс істейтін менің таныстарым ол туралы көп әңгімелеп, оның келешегін талқылайтын, мен де ақпарат жинақтай бастадым. Мені АХҚО-ның ағылшын жалпы құқығына сәйкес реттелетіні қызықтырды, мен оны басқа пәндердің қатарында университетте өткен болатынмын. Әңгімелесуден сәтті өткен соң, мен биржаның жобалау бөлімінде жұмыс істей бастадым – ол уақытта АІХ компанясы тіпті әлі жоқ та еді. Бұл нағыз стартап болды, бәрі жоқтан басталды және алғашқы кезеңде біз көп дегенде 10-15 адам ғана едік. Біз биржа қазір жұмыс істеп жатқан бизнес-процестерді, қағидалар мен қағидаттарды ойластырған едік. Бұл, әсіресе жас қызметкер үшін, өзің жұмыс істейтін компания көз алдыңда өзіңмен бірге дамыған бірегей және шабыттандыратын тәжірибе болды.

Біз үшін ауқымды және көп еңбекті қажет ететін жоба сауда жүйесін – бағалы қағаздарды орналастыру және брокерлер мен эмитенттер сауда-саттықты жүзеге асыру үшін пайдалана алатын электрондық сауда алаңын ендіру болды. Басында біз анағұрлым қолайлы сауда алаңын іздедік, сосын оны тестілеп, кастомизацияладық. Nasdaq сауда жүйесінің шынында да нарықтағы ең үздік екенін уақыт көрсетті және қазір біз бұл сауда жүйесін сәтті ендіру тәжірибемізбен басқа биржалардың өкілдерімен бөлісе аламыз.

АІХ-те көптеген қазақстандық мемлекеттік және тіпті жеке компанияларға тән шектен тыс бюрократия жоқ. Жұмыс процесін әзірлеген кезімізде, біз әлемдегі озық іс-тәжірибе мен прогрессивті тәсілдемені пайдалануға тырыстық. Осының арқасында АІХ – бұл икемді компания, онда жаңа идеяларды оңай ендіруге, сыртқы сын-тегеуріндерге тез ден қоюға және әлемдік үрдістерді қадағалап отыруға болады.

Маған көпжоспарлылық пен көпміндеттілік ұнайды. Осында жұмыс атқарған уақыт ішінде мен капитал нарығының және биржа жұмысының барлық дерлік саласына қатысты жұмыс істеп көрдім. Осының арқасында менің қаржы саласындағы білімім орасан зор артты. Бұл менің кәсіби өсуіме мүмкіндік беретін нәрсе. Қазірде мен инвестиция әлемін өздері үшін енді ғана аша бастағандардың да биржалық ноталармен сауда жасауларына мүмкіндік беретін Tabys мобильді қосымшасының бөлшек сауда инвесторларымен жұмыс істеудемін.

Мен АІХ-тің келешегі зор деп сенемін. Шығарылған бағалы қағаздар санының статистикасы, біздің биржаның сауда мүшелеріне айналған жергілікті және шетелдік брокерлер саны, сауда-саттық көлемінің артуы – мұның бәрі артық сөзді қажет етпейді

Кәсіби құзыреттерден басқа ең маңызды машық – бұл бәрін де тез қағып алу деп өз тәжірибеме сүйеніп айта аламын. Біздің заманымызда тек тәжірибе ғана емес, сонымен қатар тез дендеп, оқып-үйрену де маңызды. Біз жаңа жобаларды іске асырған кезде, кез келген жаңа істе қалай болғанда да туындайтын кедергілер мен қиындықтарды жеңу тәсілдерін табуға тура келеді. Міне, сенің бір сәтте шешім қабылдай алуыңа мүмкіндік беретін ой ұшқырлығы осында өте көмектеседі. Мен табысқа жетудің басты тәсілі осы деп санаймын.

Жаңа көкжиектерді ашу

АХҚО органдарында жұмыс істегенге дейін менің «үлкен төрттікте» – дублиндік Ernst&Young кеңсесінде, содан кейін «Бәйтерек» ҰБХ-ның Астанадағы еншілес құрылымында жұмыс істеу тәжірибем бар болды. 2016 жылы АХҚО-ның құрылатыны туралы хабарланғанда, осында – өршіл міндеттер қойып, жаңа көкжиектер ашатын жаңа ұйымда жұмыс істеу мені қатты қызықтырды, сондықтан да мен жұмысты интерн позициясынан бастауға әзір болдым.

Біз шағын ұжым болып бастадық және де бұл ең өнімді, ең күрделі, бірақ ең көңілді де уақыт еді. Біздің сөйленетін сөздердің тезистері мен презентациялар дайындаудан бастап серіктестермен және мердігерлермен көліссөздер жүргізуге дейін – бәрін істеуімізге тура келді. «Субординация» деген түсінік жоқ-тұғын. Жұмыс күнделікті қайнап жатты, көптеген мәселелерді осы жерде және тап қазір шешуге тура келді, сол себепті біз директорлармен де, басқарушы директорлармен де тең қарым-қатынаста болдық. Біз бәрі де ашық ортаға салынатын жанұя іспетті болдық.

Қазір процестер жолға қойылған, ал ол кезде, ең басында, біз өзімізді оқдәрі толы бөшке үстінде отырғандай сезіндік, кез келген нәтижеге дайын болдық. Күйзелістік жағдайлар өте көп болды, бірақ біздер бір-бірімізге барынша қолдау көрсетуге дайын едік. Ең жағымдысы – мен дәл осы жерден жаңа достарымды таптым, біз олармен оттан да, судан да бірге өттік. Біздің командамызда жұптардың пайда болғаны да сол кез, олар бақытты отбасын құрып, АХҚО-да жұмыстарын жалғастырды.

Қанша өкінішті болғанымен, Қазақстанда қор нарығы әлі де өте әлсіз дамыған, халықтың қаржылық сауаттылығы төмен деңгейде. Шынымды айтсам, осы салада жұмыс істей бастағанымда, мен үшін «биржадағы сауда-саттық», «бағалы қағаздарға инвестициялау» алыс та, түсініктіз нәрселер болған.

Сонымен қатар, қор нарығы орнында тұрған жоқ, жаңа үрдістер пайда болуда және әрқашан да жаңа лепке ілесе алу керек. Үнемі жаңа жобалар туындап отырады, оларды іске асыру тәсілдерін біз бірге іздестіреміз. Мұндай күрделіліктер оқып-үйренуге, өз машықтарыңды дамытуға қозғау салады. Маған букбилдингтер, ІРО мен крос-листингтер ұйымдастыруға қатысу ұнайды. Цифрлармен жұмыс істегенді, талдау жұмыстарымен айналысқанды жақсы көремін.

Бүгінгі таңда елдегі ахуал өзгеруде, адамдар өз жинақтарын сақтаудың және көбейтудің баламалы тәсілдеріне көптеп қызығып, биржаның қалай жұмыс істейтінін және оның қандай мүмкіндіктер беретінін зерделей бастады. Биржадағы орналастырулардың арқасында қазақстандық бизнес – «көгілдір текшелер» – қазақстандықтар үшін қолжетімді болып келе жатыр, сондықтан ұлттық байлықтан, ресурстардан әркім өз үлесін ала алады. Және де АІХ жұмысының арқасында мұндай мүмкіндіктер күн өткен сайын көптеп пайда болуда. Біздің міндетіміз – Орталық Азиядағы қаржылық хабқа айналу және біз осыған қарай жоспарлы түрде алға басып келе жатырмыз.

Маған АІХ басшылығының биржа жұмыскерлеріне өте демократияшылдықпен қарауы ұнайды. Қандай болмасын идея қошеметтеледі және біреу айыптайды немесе сынап-мінеп тастайды деген қорқыныш жоқ. Әр қызметкердің дауыс беру құқығы бар. Бұл өте жақсы топтастырады. Бізді бірыңғай командалық рух, ортақ мақсаттар мен құндылықтар біріктіреді.

Біздің ұжымымыз шылы шырайлы, біз жаңа адамдарды қуана қабылдаймыз. Бастысы – ашық, көпшіл болу, «ақылсыз» сұрақтар беруден қорықпау. Іс-тәжірибе көрсетіп отырғандай, мұндай сұрақтар болмайды – бізде тек жұмыс процесінде ғана білуге болатын жайттар өте көп.

Және ең бастысы – жаңа нәрселерден қорықпау көрек. Мұнда сізге қолдау көрсетіліп, барлық жағдайларда көмек берілетініне сенімді болуға болады.

Консалтингтен Big Data-ға. Қаржы саласында өз орныңды қалай табуға болады
Үйреншікті қызмет саласын айырбастап, өз өзіңді тегеурінге салу – оңай міндеттердің бірі емес. Жолайрыққа жеткен тұста, адам абдырап қалады. Бірақ көбінесе өзіңді өзің табуға біреудің басынан кешкен оқиғалардың көмегі тиеді. Біздің материалымыздың кейіпкерлерінікі сияқты.

Декрет – тұлғалық өсу уақыты

Мен Назарбаев Университетті 2016 жылы тәмамдадым, мамандығым – экономика. Төртінші курста мен McKinsey оферін алдым да, екі жылымды сонда өткіздім, кейін декретке шықтым. Жұмыс істеген уақытымда менің әртүрлі индустрияда жобаларым болды, алайда мен олардың біреуін таңдап алуым керектігін түсінетінмін, өйткені әр нәрсені аздап білу – бұл менің жолым емес. Мен үшін корпоративтік қаржы және қаржылық модельдер әзірлеу өте қызықты екенін түсіндім және магистратураға түсуге бел будым.

Мен Назарбаев Университеттің бизнес-мектебінде MSF бағдарламасының алғашқы тобы бітіріп шыққалы тұрғаны туралы естіп білдім. Онда бакалавриатта меніміне бірге оқыған балалар көп еді. Олардың бәріне бағдарлама ұнағанын есту мені қуандырды. Олар пән туралы, профессорлардың жоғары деңгейі жөнінде және бұл бағдарламаның қолайлы әрі өмірде қолдануға келетінін туралы айтты.

Жүктілігімнің жеті айлығында мен GMAT тапсырып, конкурстық іріктеуден өттім. Оқуды қызым үш айға толғанда бастадым. Бірақ мен оқып жүргендердің ішіндегі жалғыз ана емес едім, менің курстасымның 9 айлық баласы бар болды. Ал МВА бағдарламасында тіпті жанұялық жұп та оқыды, олардың балалары 3-4 айлық еді. Алайда барлығымыз да ойдағыдай оқып шықтық.

Қызыммен бірге магистратурада оқу

Магистратурада мен өзім іздегендей өте көп білім алдым. Мен кішкентай балам бар болған соң, маған жеңілдіктер жасалатын шығар деп ойладым (күледі). Бірақ өте күрделі болды. Мен сабақта алты сағаттан аса болған кездерімде, жұбайым мен анам қызымды алып келіп аулада жүрді, онымен үзіліс кезінде кездесетінмін. Сондықтан ол да менімен бірге магистратураны бітірді! Келешекте қызым қаржыгер болса, таңданбаймын.

Бағдарламамен қатар мен Chartered Financial Analyst Level сертификатына тест тапсырдым (қаржы талдаушылар үшін ең беделді халықаралық сертификаттардың бірі). CFA – таза теория, ал MSF-та біз әртүрлі – Python, SAS, SQL тілдерінде өте көп кодтадық. Дәл біздің ағымымызда әкімшіліктің digital-бағытқа бет бұруды ойластырғаны тамаша болды.

Бізде екі резидентура бар болды – бірі Алматыда Ұлттық банкте, екіншісі – Лондондағы Cass Business School. Ұлттық банкте болғанымызда, бізге Азат Өскенбаев сабақ берді, ол қазір төлем теңгерімі департаментін басқарады. Біз дәл сол кезде макроэкономика курсын аяқтаған болатынбыз, ол бізге мұның не екенін нақты кейстарда көрсетті. Бұл өте әсерлі дәрістер болған еді.

AIX-тегі мансап

Қазақстанда қаржыгерлер үшін нағыз қызықты жобалар бар орындар аса көп емес. Мен қаржы әлеміне тереңдеп, бағалы қағаздар қалай құрылымдалатыны туралы білгім келді. Сондықтан мен Astana International Exchange-ге өтініш беріп, оларға биылғы ақпан айында қосылдым. АІХ миссиясы – Қазақстанда белсенді капиталды дамыту. Биржада осы миссияның шеңберіндегі әлеуметтік бағытталған, елдегі қаржылық сауаттылықты дамыту, бөлшек сауда инвесторлары мен эмитенттердің санын арттыру көзделген жобалар көп.

Менің биржадағы ең қызықты жобам – бөлшек сауда инвестицияларына арналған Tabys мобильді жобасын іске қосу. Ағымдағы ахуалды ескере отырып, болашаққа арнап қаражат жинау және ұзақмерзімді келешекте жиналымдардан банк депозитімен салыстырғанда анағұрлым елеулі табыс алу өте маңызды болып табылады.

Forbes.kz мақаласын толығымен мында оқуға болады.

Алғы шеп

Білімді Қазақстанда алдым, тағылымдамадан Нью-Йоркте өттім, онда телекоммуникациялық компанияда жұмыс істеудің орайы келді. Бұл маған кәсіби тұрғыдан зор ықпал жасаған өте құнды тәжірибе болды. АІХ-ке дейін egov.kz электронды үкіметінің порталын жетілдіру және оны техникалық қолдауға басшылық еттім, оның қызметіне әрбір қазақстандық жоқ дегенде бір рет жүгінді деп сенемін.

АІХ-те алғашқы кезеңде консультация беруші ретінде жұмыс атқардым – техникалық тұрғыдан көмек көрсетуім сұралды. Nasdaq компаниясымен ынтымақтасып, олардың сауда платформасымен жұмыс істеу жоспарланғаны мені тартты. Америкалық менеджменттің қалай жұмыс істейтіні, олардың жаңа технологияларды қалай ендіріп, жобаларды қалай іске асыратыны маған ұнайды, сондықтан осы процеске кірігу шешімін қабылдадым. Жобаның мен бұрыннан айналысқым келіп жүрген қаржы саласымен байланысты болғаны да қызытырды.

АІХ топ-менеджментінің технология саласындағы басты шешіші, меніңше, биржаның инфрақұрылымын Amazon Web Services (AWS) бұлттық жүйесіне көшіру болды.

Әдетте, биржалар мен басқа да қаржы ұйымдары – бұл классикалық консервативті жүйе, олардың белгілі бір локацияда өздері байланған екі-үш дата-орталықтары бар болады. Форс-мажор жағдайында дата-орталықты жаңа жерге көшіру –бұл ұзақмерзімді және қымбатқа түсетін жоба, ол ұйымның жұмысын баяулатуы немесе мүлде тоқтатып тастауы, үлкен қаржылық шығынға батырып, беделіне нұқсан келтіруі мүмкін. Сондықтан көптеген елдерде компаниялар өз сервистерін біртіндеп бұлттық жүйелерге көшіріп, гибридтік режимге ауысып жатыр. Бүгінгі таңда АІХ инфрақұрылымы толығымен, Nasdaq сауда қозғалтқышын қоса, бұлттық жүйеде орналастырылған әлемдегі жалғыз болмаса да, санаулы биржалардың бірі. Біз бұл бағыттағы алғашқылар болдық, біздің кейсіміз туралы Nasdaq және AWS сайттарынан оқуға болады.

Біздің серверлік қуаттарымыз бұлтқа орналастырылған, қазіргі уақытта біз оларды тұжырып, небәрі жарты сағаттың ішінде кез келген, Нью-Йорк, Париж немесе Шанхай болсын, басқа локацияда ұйымдастыра аламыз және биржаның функцияларына бұл еш әсер етпейді. Тағы бір оң жағы – виртуалды инфрақұрылым локацияларды ғана емес, сонымен қатар провайдерді де оңай алмастыруға мүмкіндік береді. AWS-тен басқа, мұндай қызметтерді Google, Microsoft және басқа компаниялар көрсетеді.

Стартап ретінде біз дамып, өсіп келе жатырмыз, бізге үнемі жаңа қуаттар керек. Егер бұл қуаттар бұрынғыдай сатылып алынатын болса, онда мердігерлер іздеуге, коммерциялық ұсыныстарды талдауға, шарттар жасасуға және т.б. көп уақыт қажет болар еді. Сатып алу процесіне кететін уақыттың ішінде біз бұл жобадан бас тартып та қалуымыз мүмкін. Бұлтта болса мұның бәрі санаулы минуттарда өтеді: жоба керек пе – серверді «көтересің», жоба енді керек емес пе – серверді «өшіресің». Бұл сонымен қатар ақша үнемдеу және процестерді оңтайландыру мәселесі де. Бұдан басқа, AWS бұлттық технологиялары – бұл тек виртуалды сервистер ғана емес, сол сияқты қауіпсіздік стандарттары, бұл болса биржа жұмысына қойылатын негізгі талаптардың бірі.

АІХ-те маған достастық және жайлы ахуал, әріптестер арасындағы тең қарым-қатынас ұнайды. Жай амандасып, қал-жағдайыңды білу үшін биржа басқармасының төрағасы сенің кабинетіңе соққанын әдеттегі қазақстандық компаниялардың қайсысынан көре алар едіңіз – мен мұны елестете алмаймын. Ал АІХ-те бұл қатардағы жай.

#AIXteam бейне айдарының жаңа кейіпкері - Реттеу және комплаенс департаментінің аға менеджері Мадина Артурова.
AIX командасынының бір мүшесі болмас бұрын Мадина үш деңгейлі сұхбаттан өтті. HR маманмен, реттеу және комплаенс командасымен және биржаның қаржы директорымен сұхбаттасқанда Мадина көптеген сұрақтарға жауап берді. Ал AIX-те сұхбат барысында қандай сұрақтар мүлдем қойылмайтынын білгіңіз келсе бейнежазбаны көруге кеңес береміз.

Командамыздың мүшелерімен таныстыруды жалғастырамыз.

#AIXteam айдарының бүгінгі кейіпкері - ІТ командасындағы инфрақұрылым инженері Роман Жердентапқанов.
Ол биржаның ақпараттық жүйелеріне қызмет көрсету жұмысын жүргізеді. Роман AIX сауда қозғалтқышы және Tabys бағадарламасының жұмысы жайлы барлығын біледі. Алайда ол ІТ-саласына келіп, AIX командасының мүшесі болмай тұрып, басқа салаларда жұмыс істеген.

Еңбек жолын толықтай өзгертіп, ұнайтын істі қалай табуға болады? Бұл роликте Роман осы жайлы айтып береді.

AIX ұжымдағы отбасылық атмосфера

Astana International Exchange өз қызметкерлерінің өсуі мен дамуына белсенді атсалысады. АІХ-тің әрбір мүшесі мен бұрынғы мүшесінің АІХ-тегі кәсіби дамуы және қалай өскені жайлы бірегей тарихы бар.

Бүгін киберқауіпсіздік саласының маманы, Салтанат Машированың жетістіктері жайлы сөз болады.

«Менің өмірдегі ең сәтті шешімдерімнің бірі 2018 жылы Astana International Exchange-ге қосылуым болды. Алғашқы келген күннен бастап АІХ мені өз қамқорлығына алды: маған әрдайым қолдау көрсетілді, менімен адал болды, ұжымдағы ахуал жанұядағы жағдайды еске салды. Менің бұрынғы әріптестерім мен үшін тек әріптестер ғана емес, сонымен бірге ең жақсы достарыма айналды. Басшыларым Валерий Цой және Тимоти Беннет әрқашан да көмекке келуге дайын тұрды – олар менің өмірімдегі ең керемет басқарушылар. АІХ-те жұмыс істеген кезімде мен қор биржасындағы АТ-қауіпсіздік саласында ірі ауқымды жобалармен айналысып, жетекшілік еттім. Мен ISO 27001/27032 стандартын алғаш рет ендірдім және Израильдің Стандарттар институты мұқият аудит жүргізгеннен кейін ISO 27001/27032 сертификаты берілді.

Бұған қосымша, АІХ маған Cloud Access Security Broker және Market Announcement Platform сияқты АТ-қауіпсіздік саласындағы ірі ауқымды жобалардың Орталық Азиядағы алғашқы әзірлеушісі болу мүмкіндігін берді. АІХ маған активтердің қауіпсіздігі, тәуекелдерді басқару, желілік қауіпсіздік, SDLC, BCP/DRP, сәйкестендіруді және қолжетімділікті басқару, бұлттық қауіпсіздік, инфрақұрылым қауіпсіздігі, қауіпсіздікті бағалау және тестілеу сияқты ақпараттық қауіпсіздік пен киберқауіпсіздіктің барлық салаларын жете түсінуіме көмектесті.

Жұмыс істеген уақыт ішінде мен өз білімдерімді кеңейтуге қатысты басшылықтан қолдау алып отырдым.Осының нәтижесінде ақпараттық қауіпсіздік саласындағы кеңейтілген оқытудың CISSP, CISM, CISA сияқты кәсіби сертификаттарына ие болдым.

АІХ-тен кету оңай шешім болған жоқ. Мен көп нәрсе үйрендім және бұл тәжірибем үшін алғысым шексіз. Мен әрдайым Astana International Exchange жанашыры боламын және оның одан әрі қарай табыстарға жете беруін тілеймін».

Қазіргі уақытта Салтанат Маширова Honeywell компаниясында киберқауіпсіздік жөніндегі консультация беруші (өнеркәсіптік АТ және киберқауіпсіздік жөніндегі инженер/архитектор) болып табылады. Ол мұнай, газ және энергетика өнеркәсібінің әртүрлі салаларында басқару, желілірді жобалау және киберқауіпсіздік жүйелері бойынша маманданған. Салтанат киберқауіпсіздікке арналған түрлі іс-шаралардың спикері/қатысушысы, үлгі-өнеге тұтарлық маман. Бос уақытында ол білім беру ресурстарына қолжетімділік шектеулі ауылды жерлердегі қыз балаларға ағылшын тілін үйренуде, жаратылыстану ғылымын зерделеуде және өз армандарына жету үшін болашақ мамандығын таңдауда көмектеседі.

Салтанат – Siberx Консультациялық кеңесінің мүшесі, Киберқауіпсіздіктің 1-ші жаһандық обсерваториясының мүшесі, Women of Security мүшесі, Women Tech, ISACA Astana Chapter бүкіләлемдік елшісі, Iqanat тәлімгері, CISSP тәлімгері, 2022 жылғы IFSEC Global – Security & Fire Safety News қазылар алқасының мүшесі және басқа да көптеген жобалардың қатысушысы.

Жұмыс сіздердің басты әуестіктеріңіз керек

Мен этникалық қазақпын, бірақ Қытайда туғанмын. Шанхай университетін бітіргеннен соң Қытайда білім беру саласында кәсіби қызметімді бастадым. Алайда екі жылдан кейін Алматыға КИМЭП университетіне ауыстым, қаржы саласында МВА дәрежесін алдым, сосын маркетингпен және студенттер қабылдаумен айналысып, бағдарламалар менеджері болып жұмыс істедім.

Мен АІХ-ке ол дәл іске қосылып жатқан сәтте келдім. Шынымды айтсам, жұмысты бастаған кезімде қаржы саласында үлкен іс-тәжірибем болған жоқ, бірақ олқылықтардың орнын тез толтырып, әлемдік деңгейдегі қор биржасында бизнес-тізбекпен байланысты тәжірибе алу мүмкіндігіне ие болуымның жолы түсті.

Басында оңай болған жоқ және әр істің ұсақ-түйегіне дейін өте-мөте назар аударып, бүкілі де «мінсіз» болуын керек еткен басшымыз жағдайды одан сайын күрделендіріетін. Менің алдыма әруақытта жаңа да қиын міндеттер қойылып отырды, менің өзімнің «миссия орындалмайды» дегендерім мені мінсіз болуы тиіс істі одан сайын мінсіз етуге итермеледі. Тіпті қазірдің өзінде де сол уақыттың жоғары стандарттары мені мүлтіксіздікке ұмтылдырады.

«Бір белдеу, бір жол» (БББЖ) бастамасы дәл осы Нұр-Сұлтанда іске қосылды және АІХ оған ең басынан қатысып, АІХ нарығының «Белдеу мен Жол» арнайы сегментін – капитал нарығы үшін шешімдер ұсынатын БББЖ елдеріндегі алғашқы сегментті әзірледі. Оның негізгі мақсаты – өңірлік жобалардың қаржылық қажеттіліктерін қанағаттандыру үшін шетелдік, негізінен материктік Қытайдан, инвестициялар тарту. Қазақстан-Қытай ынтымақтастығының дамуын ескере отырып, БББЖ бағдарламасын қаржыландыру бойынша табысты бизнес-модельге айналу үшін, тамаша, бәлкім, бүкіл еуразиялық өңірдегі үздік инвестициялық мүмкіндіктерді іске асыру үшін Қазақстанның әлеуеті бар деп есептеймін. Шикізатты экспорттау және қосымша құны жоғары тауарларды импорттаудан басқа, біз шетелдік инвестициялар тарту есебінен экономиканы белсенді түрде әртараптандыруымыз қажет.

Мен АІХ-тің «Белдеу және Жол» нарығын дамытуға ең басынан, осы сегмент іске қосылып, негізгі нарық ойыншылары тартылған, сосын инфрақұрылым құрып және эмитенттерді тауып, нарықтың бүкіл экожүйесін оңтайландырған кезден бастап қатыстым. Мен Қазақстан мен Орталық Азия тарихында юаньмен деноминирленген облигациялардың іс жүзінде бірінші шығарылымы болған АІХ-те юаньдағы облигациялардың алғашқы листингі сияқты шын мәнінде қызықты көптеген жобаларға тікелей атсалыстым.

АІХ-тің көп жағынан шынында да халықаралық компания екені маған ұнайды. Ол халықаралық деңгейде мойындалған нормативтік базаға сәйкес жұмыс істейді және акционерлік құрылым мен басшылар командасының әртүрлі елдерден келетін мүшелерінің арасында әртараптандырудың жоғары деңгейін ұсынады. Әртүрлі мәдениеттердің бір-бірімен өзара ықпалдасуын күн сайын көруге болады. АІХ-те жұмыс істейтіндердің әрқайсысының не халықаралық жұмыс істеу тәжірибесі бар, не екі, үш, тіпті төрт тілде сөйлейді, сондықтан біреуді сенің тіліңде сөйлеп жатқанын есту таңқаларлық емес.

Командасы ешқашан да соншалықты үлкен болып көрмесе де, жұмыс атқарған үш жылдың ішінде АІХ елеулі нәтижелерге жетті. Егер сезімталдық, тиімділік, жауапкершілік пен командалық рух жоғары дәрежеде болмаса, оның мұндай табысқа жетуі екіталай.

Уақытымыз үйде отбасымен бірге емес, жұмыста көбірек өтеді. Сондықтан жұмысыңыздың сізді шын мәнінде қызықтыратынына көз жеткізіңіз. Атқарып жатқан ісің ұнаса, жемісін жинап, әрі қарай өсу анағұрлым жеңіл. Сол сияқты позитивті көңіл-күйді сақтау өте маңызды. Мінсіз ұйым немесе құрылым жоқ, бірдей жағдайларда сізден гөрі жемісті нәтижелерге қол жеткізетін адам әрқашан болады. Осыған назар аудару керек деп ойлаймын. Біздің барлығымыз да өз жеке брендімізді дамытамыз және осынау тез өзгеріп отыратын әлемде бәсекеге қабілеттілігімізді сақтау үшін өз білімімізді, тәжірибемізді, сонымен қатар кәсіби және коммуникативтік машықтарымызды үнемі жетілдіріп отыруға тиіспіз.